Хандақнинг қазилиши
Расулуллоҳ соллаллоҳу алайҳи васаллам уларнинг тил бириктириб келишаётгани ҳақида эшитганларида Мадина атрофига хандақ қазишни буюрдилар. Мусулмонларни ажр олишга тарғиб қилиш учун Расулуллоҳ соллаллоҳу алайҳи васаллам ўзлари ишладилар ва мусулмонлар ҳам у Зот билан бирга ишлашди. Расулуллоҳ соллаллоҳу алайҳи васаллам тер тўкдилар, улар ҳам тер тўкишди. Фақатгина мунофиқлар бу ишдан ўзларини олиб қочишди. Улар ўзларини заиф қилиб кўрсатиб, Расулуллоҳ соллаллоҳу алайҳи васалламга билдирмай, изн олмай, уйларига кетиб қолишарди. Мусулмонлардан бирор кишининг зарур иши чиқиб, кетиши керак бўлиб қолса, буни Расулуллоҳ соллаллоҳу алайҳи васалламга билдирар, ишини битириб келишга изн сўрарди. Расулуллоҳ соллаллоҳу алайҳи васаллам унга изн берардилар. У ишини битиргач, эзгулик истаб, савоб умид қилган ҳолда яна хандақ қазишга қайтиб келарди.
