Бани Мусталақ ғазоти

Олтинчи ҳижрий сананинг шаъбон ойида Расулуллоҳ соллаллоҳу алайҳи васалламга бани Мусталақ қабиласи у Зотга қарши одам тўплаётгани ҳақида хабар келди. Пайғамбар соллаллоҳу алайҳи васаллам душманни кутиб ўтирмасдан устига босиб боришга қарор қилдилар. Ўша сафар Ислом лашкари ичида Убай ибн Салул бошлиқ кўплаб мунофиқлар ҳам чиқдилар. Мусулмонларнинг Хандақ урушидаги ғалабасидан кейин улар тарозунинг оғир палласи томонига ўтиб олган эдилар. Икки тараф бани Мусталақнинг «Мурайсиъ» номли сувхонаси ҳудудида тўқнашди. Шунинг учун ушбу ғазот «Мурайсиъ» ғазоти ҳам дейилади. Урушда мусулмонлар ғолиб келдилар. Кофирлар енгилдилар.