Ҳижрий сана
Абдулмалик ибн Ҳишом: бизга Зиёд ибн Абдуллоҳ ал-Баккоий Муҳаммад ибн Исҳоқ ал-Муталлибийдан ривоят қилиб дейди: «Расулуллоҳ соллаллоҳу алайҳи васаллам Мадинага душанба, туш пайтидан сал олдин, қуёш тиккага келай деганда, «рабиъул-аввалнинг ўн иккинчи куни келдилар». Ибн Ҳишомнинг айтишича, ҳижрий сана шу кундан бошланади.
Ибн Исҳоқ: Расулуллоҳ соллаллоҳу алайҳи васаллам шу куни эллик уч ёшда эдилар. Бу Пайғамбар бўлиб юборилганларининг ўн учинчи йили эди. Рабиъул-аввал ойининг қолган кунлари ҳамда рабиъул-охир, икки жумод ойи, ражаб, шаъбон, рамазон, шаввол, зул-қаъда, зул-ҳижжа ва муҳаррам ойлари Мадинада бўлдилар. сўнг сафар (Мадинага келганларининг ўн иккинчи) ойининг бошларида юриш қилишни бошладилар. Ибн Ҳишомнинг айтишича, ўшанда Мадинада Саъд ибн Убодани ўз ўринларига қолдирдилар.
