Расулуллоҳ, биздан бўлингиз рози.

2 йил аввал 1718 siyrat.uz

Бугун барча қалбда ҳаяжон-титроқ, Қалб яқин, масофа бўлса-да йироқ, Умматингиз соғинчи чексиз, мутлоқ, Расулуллоҳ, биздан бўлингиз рози.   Оламларнинг суюклиси, ардоғи, Ўзингиздир ҳаётимиз чироғи, Бизни қийнар доим соғинч фироғи, Расулуллоҳ, биздан бўлингиз рози.   Ҳар ишда амал қилмаймиз суннатга, Уларни ўргатгансиз биз умматга, Дуо қилинг қуламайлик зулматга, Расулуллоҳ, биздан бўлингиз рози.   Қолганми бировда бироз адолат, Омонатга қиламиз кўп хиёнат, Ҳаётимиз бўлиб қолди жаҳолат, Расулуллоҳ, биздан бўлингиз рози.   Қуръонимиз турар доим бир жойда, Ўқирмиз баъзида, балким бир ойда, Ишимиздан топурмиз қандай фойда, Расулуллоҳ, биздан бўлингиз рози.   Ўзимизча яшаймиз деб шохона, Дунё ташвишида бўлиб овора, Охират уйини қилдик вайрона, Расулуллоҳ, биздан бўлингиз рози.   Мол-дунёга бўлдик, афсус, парвона, Нафсга қарши курашолмай мардона, Гуноҳ қилдик уялмайин пинҳона, Расулуллоҳ, биздан бўлингиз рози.   Ризқимиз аслида ҳаромми-ҳалол, Билмоқликка баъзан оламиз малол, Эй воҳ, бу қандайин кўргулик-аҳвол, Расулуллоҳ, биздан бўлингиз рози.   Бир кун келганида соат-қиёмат, Маҳшарда чекканда афсус-надомат, Ўшал онда бизни қилинг шафоат! Расулуллоҳ, биздан бўлингиз рози.   “Умматим” деб доим қилдингиз нидо, Сизга бўлсин доим жонимиз фидо, Бизни қўшни қилсин Жаннатда Худо, Расулуллоҳ, биздан бўлингиз рози.  

Андижон “Саййид Муҳйиддин махдум” ўрта махсус

ислом билим юрти талабаси Қобулов Ҳикматуллоҳ Ҳамидуллоҳ ўғли.




Мавзуга оид мақолалар
Тарихда бугун
Жумодал-аввал ойининг 16-куни

Ҳижрий 931-йил 16-жумодул-аввал куни (милодий 1524-йил 12-март) Россия Усмонлилар давлати билан «Бухарест» шартномасини имзолади. Шартномага кўра «Афлоқ» ва «Бағдод» вилоятлари Усмонлилар давлати ҳукмронлиги остида бўлади.

Ҳижрий 1356-йил 16-жумодул-аввал куни (милодий 1937-йил 24-июл) Ироқ ва Эрон давлатлари ўрталаридаги ўзаро зиддиятларни тинчлик йўл билан ҳал қилиш мақсадида беш йиллик тинчлик шартномасини туздилар.  



Китоблар
ИСЛОМ.УЗ ПОРТАЛИНИНГ САЙТЛАРИ