Туббоннинг Мадина халқидан ғазабланиши ва бунинг сабаби

Ибн Исҳоқ: Туббон Машриқ томонга қилган сафаридан қайтаётиб Мадинага кириб ўтди. Чунки сафарини бошлаган пайтда у ерда ўғлини қолдириб кетган эди. Бу пайтда Мадина халқига нисбатан ғазаби йўқ эди. Аммо маҳаллий аҳолидан баъзилари унга хиёнат қилиб, унинг ўғлини ўлдириб қўядилар. Шундан кейин у Мадинани хароб қилиш, аҳлини эса таг-томири билан йўқотиш ва хурмоларини кесиб ташлаш нияти билан кириб келади. Унга қарши ансорлар маҳаллаларидан бири аскар тўплайди. Уларнинг бошлиқлари эса бани Нажжорнинг иттифоқдоши бўлган Талланинг ўғли Амр ва Амр ибн Мабзул ўғилларидан бири эди. Мабзулнинг асл исми Омир ибн ан-Нажжордир. Нажжорнинг асл исми эса Таймуллоҳ ибн Саълаба ибн Амр ибн Хазраж ибн Ҳориса ибн Саълаба ибн Амр ибн Омирдир.