Абдулмутталибнинг у Зот соллаллоҳу алайҳи васалламни гўдакликларидан ҳурмат қилгани

Ибн Исҳоқ: Абдулмутталиб набираси Расулуллоҳ соллаллоҳу алайҳи васалламни жуда яхши кўрар, унга ўзгача ҳурмат кўрсатарди. Абдулмутталибга Каъбанинг соясига тўшак солиб қўйилар, унинг фарзандларидан биронтаси оталари ҳурматидан унга ўтира олмас эди. Расулуллоҳ соллаллоҳу алайҳи васаллам эса ёш гўдак бўлишларига қарамай, тўшакка ўтириб олардилар, амакилари бўлса, четга олиб қўйишарди. Абдулмутталиб бу ҳолни кўриб қолса: «Ўғлимга индаманглар, Аллоҳга қасамки, келажакда у юксак мақом соҳиби бўлади», – дерди. Сўнг у Зотни ўзи билан олиб ўтирар, орқаларини силар ва у Зотнинг қилаётган ишларидан завқ оларди.