Ал-Мутъим ибн Адийнинг Расулуллоҳ соллаллоҳу алайҳи васалламни қандай ҳимояга олгани
Ибн Ҳишом: «Мушриклардан Расулуллоҳ соллаллоҳу алайҳи васалламга ҳимоя берди» сўзига келсак, Расулуллоҳ соллаллоҳу алайҳи васаллам тоиф халқини ўз пайғамбарликларини тасдиқлаш ва бу йўлда ёрдамга етиб келиш учун чақирганларида улар ижобий жавоб беришмади. Шундан сўнг Расулуллоҳ соллаллоҳу алайҳи васаллам Ҳиро ғорига бордилар. Кейин ал-Ахнас ибн Шарийққа хабар юбориб, ҳимоясига олишини сўрадилар. Ал-Ахнас: «Мен иттифоқдошман, иттифоқдошлар эса ҳимоя бермайди», – дегач, бу сафар Суҳайл ибн Амрга мурожаат қилдилар. У ҳам: «Бани Омир Бани Каъбга ҳимоя бера олмайди», – деди. Ал-Мутъим ибн Адийга оғиз солган эдилар, у буни дарҳол қабул қилди, кейин оила аъзолари билан қуролланиб Каъбага келишди. Сўнгра Расулуллоҳ соллаллоҳу алайҳи васалламга одам юбориб «киринг» дейишди. Шунда дарҳол ҳимоя остида Маккага кирган Расулуллоҳ соллаллоҳу алайҳи васаллам байтуллоҳни тавоф этиб, у ерда намоз ўқидилар. Кейин эса ўз уйларига қайтдилар. Ҳассон ибн Собитнинг айтмоқчи бўлгани мана шу эди.
Ибн Исҳоқ: Ҳассон ибн Собит (ал-ансорий) ҳам саҳифани бекор қилгани учун Ҳишом ибн Амрни мақтаб шундай деди:
Ҳимояларига хиёнат этмайдиган қавм бўлган Бани Умайя, Ҳишом ўз ҳимоясида вафо қилганидек, ал-Ҳорис ибн Ҳубаййиб ибн Сухом учун аҳдлашган ҳимоясини ҳақиқатан бажо келтирадими?
Агар Бани Ҳисл кимгадир ҳимоя беришса, сўзсиз бажарадилар ва ҳимояларини саломатлик билан адо этадилар.
