Расулуллоҳ соллаллоҳу алайҳи васалламнинг ҳижрат қилишлари

Расулуллоҳ соллаллоҳу алайҳи васаллам саҳобалар ҳижратидан кейин ҳам Маккада қолиб, ҳижрат учун рухсат бўлишини кута бошладилар. Маккада Расулуллоҳ соллаллоҳу алайҳи васаллам билан муҳожирлардан фақатгина ҳибс қилинганлар, динидан чиқарилганлар, Али ибн Абу Толиб ва Абу Бакр ибн Абу Қуҳофа ас-Сиддиқ розияллоҳу анҳумгина қолишди. Абу Бакр кўпинча Расулуллоҳ соллаллоҳу алайҳи васалламдан ҳижратга рухсат сўрар, лекин Расулуллоҳ соллаллоҳу алайҳи васаллам унга: «Шошманг, балки, Аллоҳ сизга бир ҳамроҳ бериб қолар», – дердилар. Абу Бакр ана шу ишора қилинган ҳамроҳнинг Расулуллоҳ соллаллоҳу алайҳи васаллам бўлишларини умид қиларди.