Ҳижратнинг учинчи йили

 

Ёвуз одам бахти қародур, у хиёнатни ўзига шиор, суиқасдни қалқон қилиб олади. Ёмонлик қилмаса туролмайдиган бу кимса бировнинг шодлигини ҳам, қайғусини ҳам ҳис этмайди. Бани Назир қабиласининг оқсоқоли яҳудий Каъб ибн Ашраф мана шундай кимсалардан бири эди. У мусулмонларни ҳаддан ташқари ёмон кўрар, Қурайш мушрикларини сира тап тортмай Пайғамбар алайҳиссаломга қарши курашишга гиж-гижлар, турли ҳажвий шеърлар битиб, у кишини майна қилар, қандай йўл билан бўлмасин, мусулмонлар ўртасида низо чақиришга уринар, Расулуллоҳ бир ишни тузатиб улгурмай, у бузишнинг пайида бўларди.