Холид ва унинг икки дўстининг Исломга киришлари

 

Бу ғалабадан кейин мусулмонларга қарши юришларга бошчилик қилган уч нафар таниқли киши Холид ибн Валид Махзумий, Амр ибн Осс Саҳмий, Усмон ибн Абу Толҳа Абдарийлар мусулмон бўлдилар. Пайғамбар алайҳиссалом уларнинг Ислом динини қабул қилганидан бениҳоя қувондилар. «Сени ҳидоят қилган Аллоҳга шукр, — дедилар у киши Холидга. — Сенинг ақлли одамлигингни билардим, фаҳму фаросатинг сени ҳидоятга етаклашидан умидвор эдим». Сарвари оламнинг самимий муомаласидан мутаассир бўлган Холид: «Эй Расулуллоҳ, сизга қарши кўпгина жангларда қатнашдим, дуо қилинг, зора, Аллоҳ таоло гуноҳларимни кечирса», деди. Пайғамбар алайҳиссалом: «Ислом динида мусулмон бўлишдан аввалги гуноҳлар суриштирилмайди», дея уни хурсанд қилдилар.