Ошиқ қалб йиғиси

Бугуннинг йиғиси маюс кўзларникимас, Уятдан тош қотган юзларникимас, Ҳазондек тўкилган кўзларникимас, Чин ошиқ қалбларнинг йиғисидир бу. Расулуллоҳ буюклигин белгисидир бу. Маюс қалбимга қарадим, аммо Сизнинг тимсолингиз тополмадим ҳеч, Бугун кўзларим йиғлайди, аммо Чин ошиқ қалбларнинг йиғисидир бу. Расулуллоҳ буюклигин белгисидир бу. Мен ҳам йиғлайман ошиқ қалб мисоли, Қалбимни ўнглашга имкон бор ҳали, Барча йиғласин, йиғласин, майли, Чин ошиқ қалбларнинг йиғисидир бу. Расулуллоҳ буюклигин белгисидир бу. Сиздан олисдамиз, олисда йироқ, Бизни эзиб қўйди соғинчу фироқ, Юракда изтироб, қалбларда титроқ, Чин ошиқ қалбларнинг йиғисидир бу. Расулуллоҳ буюклигин белгисидир бу. Расулуллоҳ зикридан тинмайди тиллар, У Зот учун доимо йиғлайди диллар, Чаманзорда нола қилар булбуллар, Чин ошиқ қалбларнинг йиғисидир бу. Расулуллоҳ буюклигин белгисидир бу. Ўзимча, умматман, ўзимча, диндор, У Зот учун йиғладимми қалбимдан бир бор, Йиғлайин, қалбимда қолмасин ғубор, Чин ошиқ қалбларнинг йиғисидир бу. Расулуллоҳ буюклигин белгисидир бу. Ларзага келади йиғидан фалак, Ҳатто ёш тўкади осмонда малак, Қани, йиғламайсанми, эй хаста юрак, Чин ошиқ қалбларнинг йиғисидир бу. Расулуллоҳ буюклигин белгисидир бу. «Саййид Муҳйиддин махдум» ўрта махсус Ислом билим юрти талабалари Мирзоҳид Абдукаримов, Оятуллоҳ Қобулов.