Насаб баёнининг давоми. Хузоъанинг насаби

Ибн Исҳоқ: Хузоъа: «Биз яманлик Амр ибн Омирнинг авлодларимиз», – дейди.

Ибн Ҳишом: Хузоъа: «Биз Амр ибн Рабиъа ибн Ҳориса ибн Амр ибн Омир ибн Ҳориса ибн Имрулқайс ибн Саълаба ибн Мозин ибн ал-Асад ибн ал-Ғавснинг авлодларимиз», – дейди. Менга Абу Убайда ва бошқа илм аҳлларининг айтишларича, Хузоъанинг онаси Хиндиф исмли аёл эди. Баъзиларга кўра эса Хузоъа – Ҳориса ибн Амр ибн Омирнинг болаларидир. Уларнинг «Хузоъа» деб аталишларига сабаб, улар Амр ибн Омир авлодидан ажраб Ямандан Шом мамлакатини қасд этиб йўлга чиққанлар ва йўлда «Марруз-Заҳрон» деган жойга тушиб, ўша ерда қолиб кетишган. Шунинг учун улар «Хузоъа», яъни «ажралувчилар» деб аталган.