Суфадан сўнг Саъд авлодининг Каъба ишига бошчилик қилиши

Ибн Исҳоқ: Агар ҳожилар шайтонга тош отиш амалидан фориғ бўлиб, Минодан қайтмоқчи бўлсалар, суфаликлар Ақабанинг икки ёнини беркитиб одамлар йўлини тўсар эдилар. Шунда одамлар «суфаликларни ўтказиб юборинглар» дейишарди. Суфаликлар ўтиб бўлмагунича ҳеч ким ўтмасди. Қачонки суфаликлар қайтсалар, одамлар ҳам уларнинг ортидан қайтишар эди. Суфаликлар ўз авлодларидан ҳеч ким қолмагунича шу тарзда одамларнинг қайтишларида бош бўлиб келдилар. Бу ишни улардан бани Саъд ибн Зайд Манот ибн Тамим уруғи мерос қилиб олди. Бу иш бани Саъд ичидан Сафвон ибн Ҳорис ибн Шижна хонадони қўлида эди.