Давс Зу Саълабон, ҳабашлар подшоҳлиги ва Яманни эгаллаган Арёт ҳақида сўз. Давснинг қочиши ва Қайсардан ёрдам сўраши

Ибн Исҳоқ: сабаълик бир киши Зу Нувоснинг аскарларидан қутилиб қолди. Уни Давс Зу Саълабон дейишарди. У отига миниб, саҳро томонга ўзини урди ва зўрға қутилиб қолди. У шу юришда давом этиб, Рум подшоси Қайсар олдига етиб борди ва ундан Зу Нувос ҳамда унинг аскарларига қарши ёрдам сўради. У Қайсарга уларнинг қилган ишларини сўзлаб берди. Шунда Қайсар унга: «Сенинг мамлакатинг биздан узоқда, шунинг учун сенга Ҳабашистон подшосига мактуб ёзиб бераман. Зеро, у ҳам шу (насронийлик) динида ва сенинг мамлакатингга яқин»,  деди. Унга Давсга ёрдам беришини буюриб, бир мактуб ёзиб берди.