Исмоил алайҳиссалом авлодлари ва журҳум қабиласи Маккада

Аллоҳ Исмоил алайҳиссалом авлодларини Маккада кўпайтирди. Уларнинг тоғалари бўлмиш Журҳум қабиласи Байтуллоҳ ва Макканинг хўжайинлари эдилар. Исмоил алайҳиссалом авлодлари тоғалари бўлганлари, қариндошликлари учун улар билан ҳокимият талашмас, қолаверса, Макканинг ҳурматини ҳам сақлар эдилар. Макка шаҳри Исмоил алайҳиссалом авлодларига торлик қилиб қолгач, турли мамлакатларга тарқаб кетдилар. Улар қаерга бормасинлар, Аллоҳ уларни ўша ер аҳолисига раҳбар қилиб қўяр, ўша ерни ўз динлари билан бошқарар эдилар.