Хадижа розияллоҳу анҳонинг оламдан ўтиши
Пайғамбар алайҳиссалом қамалдан чиққанларидан кейин кўп ўтмай умр йўлдошлари Хадижа розияллоҳу анҳо оламдан ўтди. Ҳали дини Ислом йўлидаги қийинчиликлар бартараф этилмаган, олдинда Мадина ҳижрати бор эди. Расулуллоҳ Хадижани кўп эслар эдилар, биринчилар қатори иймон келтирган бу покиза зотнинг фазилатларини чуқур қайғу ва жон ўртагувчи андуҳ билан ёдга олардилар, муслима аёлларга ибрат қилардилар. Сарвари олам Иброҳимдан бошқа болаларининг ҳаммасини Хадижадан топган эдилар. Хадижадан туғилган тўнғич қизлари Зайнаб исломдан аввал Абу Ос ибн Робиъага никоҳланиб, улар Умома исмли қиз кўришган, Фотиманинг вафотидан кейин уни Али ибн Абу Толиб никоҳига олган эди. Усмон Расулуллоҳнинг Хадижадан топган қизлари Руқайя билан турмуш қуриб, Ҳабашистонга бирга кетишган, у вафот этгач, Мадинада Пайғамбар алайҳиссаломнинг бошқа қизлари Умму Кулсумга уйланган. Сарвари оламнинг кенжа қизлари Фотима Али ибн Абу Толибга турмушга чиққан. Расулуллоҳнинг Хадижадан топган болалари бу оламдан жуда эрта кетишган. Отадан кейин қолган Фотима ҳам узоқ яшамаган.
Яқин ҳамдами, оғир дамларда маслаҳатгўйи, ўз қабиласидаги обрў-эътибори туфайли қалтис вазиятларда қалқон бўла оладиган суянчиғи Хадижанинг вафоти Расулуллоҳни қаттиқ изтиробга солди. У киши Хадижадан Қосим, Абдуллоҳ деган ўғиллар кўрганлар. Расулуллоҳга Қосим ўғилларининг исми билан ҳам мурожаат қилишарди.
