«Islam News» ахборот агентлигининг хабар беришича, «Узуклар ҳукмдори» фильми продюссери Пайғамбаримиз соллаллоҳу алайҳи васаллам ҳақларида янги фильм суратга олади ва ушбу фильм орқали Ғарбда Ислом дини ҳақида кенг тарқалган  ёлғон тасаввурларни тўғрилайди. Фильмда Пайғамбар алайҳиссаломнинг муборак ҳаётлари – туғилишларидан олдинги даврдан то вафотларигача  бўлган  давр – ёритиб берилади. Фильмда асосий эътибор Пайғамбаримиз соллаллоҳу алайҳи васалламнинг инсонпарвар бўлганларига қаратилади. Янги блокбастер учун 150 миллион доллар сарф  қилинади. Фильмни  тасвирга тушириш 2011 йилда режалаштирилиб,  25-30 ой муддат давом этади. Асосий роллар  инглиз тилида сўзлашувчи мусулмонлар томонидан ижро этилади. Улар АҚШ ва Буюкбритания студия ва агентликлари томонидан танлов асосида қабул қилинади. Фильмга продюссерлик қилиш учун «Узуклар ҳукмдори» фильми учун «Оскар» мукофоти совриндори бўлган Барри Осборн танланди. Пайғамбаримиз ҳақларидаги фильмни тасвирга тушириш ишларини Ислом халқаро уламолари иттифоқи раиси шайх Юсуф Қарзовий назорат қиладиган бўлди. Абдуллоҳ Мустафо «Ислом Онлайн» порталига берган интерьвюсида «Биз Шайх Қарзовий жаноблари билан фильмни сценарийси, съёмкаси ва ишлаб чиқарилишини назорат қилувчи қўмита ташкил қилиш бўйича келишиб олдик», деди. Шайх Қарзовийнинг айтишича, «Ушбу фильмнинг мақсади Исломга хизмат қилишдир».