Ризоҳ ибн Рабиъа ўз юртига бориб жойлашгач, Аллоҳ унинг авлодини ва Ҳун қабиласини кенгайтирди. Улар бугунги кундаги Узра қабиласидир. Ризоҳ юртига қайтиб келганидан кейин у билан Наҳд ибн Зайд ва Ҳавтака ибн Асламлар ўртасида гап ўтиб қолди. У иккиси Қудоъанинг икки бўлагидир. Шунда Ризоҳ икки уруққа таҳдид қилди. Улар эса (Қудоъа ерларидан бутунлай кўчиб) Яманга кетиб қолдилар. Бу икки уруғ ҳозир ҳам Яманда яшайдилар. Шунда Қусай ибн Килоб Қудоъа қавмини севгани ва уларнинг аҳиллик ҳамда равнақларини яхши кўргани, укаси Ризоҳ билан улар ўртасида бўлиб ўтган ишларга ачинганидан қуйидаги шеърни ўқиди:

Менинг сўзимни Ризоҳга ким етказади, Ризоҳ, мен сендан икки нарсада ранжидим. Бани Наҳд ибн Зайд хусусидаким, Сен улар билан бизнинг орамизни буздинг. Одамлар Ҳавтака ибн Асламга ҳам ёмон муомала қилдилар-у, Бу билан менга ёмонлик қилдилар.