Ар-Рафода – ҳар йили ҳаж мавсумида қурайшликларнинг Қусай ибн Килобга ҳожиларни меҳмон қилиш учун келтириб берадиган маблағлари бўлиб, келган ҳожилар орасидаги муҳтож кишилар шу меҳмондорчиликдан ер эдилар. Бу ишни Қусай Қурайш зиммасига юклаган эди. У қабиласига бу ишни буюраётиб: «Эй Қурайш аҳли, сизлар Аллоҳнинг қўшнилари, Унинг аҳли байти ва аҳли ҳарамидирсиз. Келган ҳожилар эса Аллоҳнинг меҳмони ва уйининг зиёратчиларидирлар. Шунинг учун улар ҳар қанча зиёфат ва икромга ҳақлидирлар. Шундай экан, ҳожилар учун ҳар йили ҳаж кунларида зиёфат уюштиринглар, токи улар сизларни улуғласинлар», – деган эди. Шундан сўнг Қурайш қабиласи ўз саййиди Қусайнинг буйруғига итоат этди. Қурайшликлар ҳар йили ўз маблағларидан Қусайга келтириб берар, у тўпланган пул эвазига Минода туриладиган кунларда ҳожиларни меҳмон қиларди. Бу иш жоҳилият давридан то Ислом дини кириб келгунига қадар давом этди. Сўнг Ислом ҳам бу гўзал одатни ўрнида қолдириб, бугунги кунимизга қадар давом эттириб келмоқда.
Ибн Исҳоқ: менга Қусай ибн Килоб ҳақидаги гапларни отам Исҳоқ ибн Ясор Ҳасан ибн Муҳаммад ибн Алий ибн Абу Толиб розияллоҳу анҳумдан ривоят қилиб берган.
