Ибн Исҳоқ: Пайғамбар алайҳиссалом ўттиз беш ёшга етганларида Қурайш аҳли Каъбани қайта қуриш учун тўпландилар. Каъба ўша кунгача одам бўйидан сал баландроқ бўлиб, шифти йўқ эди. Қурайшликлар уни бузишдан қўрққанлари учун баландроқ кўтариб, устини ёпмоқчи бўлишди. Бунга бир куни Каъба ичидаги хазиналар сақланадиган қудуқдан бойликлар ўғирлаб кетилгани ва ўғирланган бойликларнинг Бани Мулайҳнинг қули Дувайк исмли кишининг уйидан топилгани сабаб бўлди.
Ибн Ҳишом: Қурайш аҳли Дувайкнинг қўлини кесдилар. Баъзиларга кўра, ўғрилар бойликни унинг уйига қўйиб туришган. Ўша кунларда денгиздаги Рум савдогарларидан бирининг кемаси Жидда соҳилига отилиб, парчаланиб кетган эди. Қурайшликлар шу кеманинг ёғочларини олиб, Каъба устини ёпиш учун тайёрлай бошладилар. Маккада бир қибтий дурадгор бўлиб, ёғочларни ёпиш учун тайёр ҳолга келтириб берди. Каъба ичидаги қудуқда бир илон бўлиб, қуёш чиқадиган вақтда Каъба деворларига чиқиб, офтобда тобланар эди. Бу илондан ҳамма қўрқарди. Чунки бирор кимса унга яқин келса, думини кўтарар, ўзига хос овоз чиқариб, оғзини катта очарди. Илон бир куни одатига кўра, қуёшда тобланиб турганида Аллоҳ унга бир қушни юборди. Қуш уни чангаллаб олиб кетди. Шу вақтда Қурайш аҳли: «Аллоҳ бизнинг ишимиздан рози бўлган кўринади, олдимизда моҳир уста ва ёғочлар бўлса, шунингдек, Аллоҳ бизларни бу илоннинг ёмонлигидан қутқарди», – дейишди.
