Исро ва меърож ҳақида
Ибн Ҳишом: Зиёд ибн Абдуллоҳ ал-Баккоий, Муҳаммад ибн Исҳоқ ал-Мутталибийдан бизга шуларни ривоят этди: Расулуллоҳ соллаллоҳу алайҳи васаллам масжид ал-Ҳаромдан масжид ал-Ақсога кечаси олиб борилдилар. Масжид ал-Ақсо Илиядаги193 байт ал-мақдисдир. Бу пайтда Ислом Маккада қурайшликлар ва барча қабилалар орасида ёйила бошлаган эди.
Ибн Исҳоқ: Абдуллоҳ ибн Масъуд, Абу Саид ал-Худрий, Расу-луллоҳнинг аёллари Оиша, Муовия ибн Абу Суфён, Ҳасан ибн Абул-Ҳасан ал-Басрий, ибн Шиҳоб аз-Зуҳрий, Қатода ва бошқа илм аҳлидан, шунингдек, Умму Ҳониъ бинт Абу Толибдан менга Расулуллоҳ соллаллоҳу алайҳи васалламнинг кечаси масжид ал-Ақсога борганлари ҳақида ривоят этилган хабарлардан бу бобда жамланган барча ривоятлар ўрин олган бўлиб, ҳар бир ровий Муҳаммад соллаллоҳу алайҳи васалламга исро пайтида юз берган ҳодисаларинг баъзиларини зикр қилиб ўтади. Расулуллоҳ соллаллоҳу алайҳи васалламнинг масжид ал-Ҳаромдан масжид ал-Ақсога тунда сайр эттирилишлари (исро) ва у ҳақида зикр этилганларда ўта нозикликлар, имтиҳонлар ва Аллоҳнинг ақл эгаларига ибрат ўрнида келтирган қудрати ва кучининг мавжудлигини изҳор этувчи тажаллиси, шунингдек, иймон келтирганларга, тасдиқ ва сабот кўрсатганларга ҳидоят ва раҳмат бор эди. Расулуллоҳ соллаллоҳу алайҳи васалламда Аллоҳнинг ишига сидқидилдан ишонч бор эди. Аллоҳ Муҳаммад соллаллоҳу алайҳи васалламга хоҳлаган нарсаларини кўрсатиш учун, ўзи ҳоҳлагандек, у Зотни кечаси сайр эттирди ва Муҳаммад соллаллоҳу алайҳи васаллам Аллоҳнинг ўзи хоҳлаганини қила оладиган улуғ куч ва қудратини кўрдилар.
