Ибн Исҳоқ: Расулуллоҳ соллаллоҳу алайҳи васаллам уйларига қайтганларида, қиличларини қўлларидан қизлари Фотима олди. Расулуллоҳ соллаллоҳу алайҳи васаллам: «Қизим! Ундаги қонни ювиб қўй. Аллоҳга қасамки, у менга бугун садоқат билан хизмат қилди», – дедилар. Али ибн Абу Толиб ҳам қиличини Фотимага бериб: «Буни ҳам олинг. Аллоҳга қасамки, у бугун менга содиқ хизмат қилди», – деди. Расулуллоҳ соллаллоҳу алайҳи васаллам: «Агар сен мардларча жанг қилган бўлсанг, сен билан Саҳл ибн Ҳунайф ва Абу Дужона ҳам мардларча жанг қилишди», – дедилар.
Ибн Ҳишом: Расулуллоҳ соллаллоҳу алайҳи васалламнинг қиличлари «Зулфақор» деб аталарди.
Ибн Ҳишом: Менга илм аҳлидан бирининг айтиб беришича, Ибн Абу Нажиҳ деди: «Уҳуд куни бир киши шундай деган:
Зулфақордан бошқа қилич йўқ,
Алидан бошқа мард йигит йўқ.
Ибн Ҳишом: Менга илм аҳлидан баъзиларининг айтиб беришича, Расулуллоҳ соллаллоҳу алайҳи васаллам Али ибн Абу Толибга шундай деганлар: «Энди мушриклар бизга бошқа бундай зарарни етказа олмайдилар. Аллоҳ бизга ғалаба беради!».
Ибн Исҳоқ: Уҳуд ғазоти шаввол ойининг ўртаси – шанба куни бўлган эди.
