Робиъул-аввал ойининг 26-кун
Ҳижрий 1369-йил 26-робиъул аввал куни (милодий 1950-йил 15-январ) мусулмон араб оламида Физика фани олимларидан бири Али Мустафо Мушрифа 52 ёшида вафот этди.
Обида ибн Амр (ёки Қайс) Салмоний тобеиннинг пешқадамларидандир. У Зот Расулуллоҳ соллаллоҳу алайҳи васаллам вафотларидан икки йил олдин Исломни қабул қилганлар. Лекин Пайғамбаримиз билан кўришмаганлар. Обида ибн Амрнинг мавқеи юксак эди. Ҳатто фиқҳ ва қозилик ҳукмларида ўта ҳушёр ва мулоҳазакорлиги билан танилган қози Шурайҳ ҳам ҳукмда бирор иштибоҳ туғилса, маслаҳат учун Обида ибн Амрга одам юборардилар. Шунга қарамасдан, Обида ибн Амр ҳазратлари фатво беришдан хавфланар, сўровчиларнинг саволига жавоб беришдан қочардилар. Айниқса, савол Аллоҳнинг китобидаги бирор оят ҳақида бўлса, жавобдан ўзини тортиб турардилар. Ибн Сийрин айтадилар: «Обидадан бир оят ҳақида сўрадим. «Қуръонда нозил бўлган нарсаларни биладиган кишилар ўтиб кетди. Энди сенга вожиб бўлгани Аллоҳдан қўрқиш ва тўғриликдир» деди. Обида ибн Амр Салмоний (раҳматуллоҳи алайҳ) ҳижратнинг 72-йилида вафот этганлар.
