Ибн Ҳишом: менга Абу Убайданинг хабар беришича, Бакка – Макка шаҳрининг марказига берилган номдир. Чунки маккаликлар ўша ерга тўпланиб, тиқилинч пайдо қилар эдилар. Шунга кўра, «Бакка» сўзи араб тилидаги «табокк» (тиқилишмоқ)дан олинган бўлиб «халқ тўпланадиган, тиқилишадиган жой» деган маънони беради. Бакка дейилганда Байтуллоҳ ва масжид тушунилади.

Ибн Исҳоқ: журҳумликлар мағлуб бўлгач, Амр ибн ал-Ҳорис ибн Музоз ал-Журҳумий Каъбадаги сув мешларини ҳамда унинг бурчагидаги ал-Ҳажар ал-асвад (қора тош)ни олиб чиқиб, замзам қудуғи ичига кўмди. Сўнг ўзи ва унинг қабиладошлари Яманга қайтиб кетдилар. Улар Макка шаҳри ва унга бошчилик қилишни ташлаб кетаётганлари учун қаттиқ қайғурдилар.