Қусай ўзини Каъба ва Маккани бошқаришга Хузоъа ва Бакр авлодидан кўра лойиқроқ деб билди. У Қурайшни Иброҳим алайҳиссаломнинг ўғли Исмоил алайҳиссалом авлодлари орасида энг сараси деб биларди. Шунинг учун Қурайш ва бани Кинонанинг улуғлари билан кенгашиб, уларни Хузоъа ва бани Бакрни Маккадан чиқариб юборишга чорлади. Улар Қусайнинг бу даъватини қабул этдилар.
Қусай ўзининг она бир, ота бошқа укаси Ризоҳ ибн Рабиъага мактуб йўллаб, ўзи билан бирга душманларга қарши жанг қилишга чақирди. Ризоҳ ибн Рабиъа укалари Ҳун ибн Рабиъа, Жулҳума ибн Рабиъалар билан бирга Қусайга ёрдамга келди. Хузоъа қабиласининг даъвосига кўра, Ҳулайл ибн Ҳубшия Қусайга юқоридаги ишни қилишни тавсия қилиб, унга «Сен Каъба ва Макка амирлигига Хуозоъадан кўра ҳақлироқсан», деган, кейин Қусай шу талаб билан чиққан эмиш. Аммо биз буни улардан бошқа ҳеч кимдан эшитмадик. Аслида қандай бўлганини Аллоҳ билувчироқдир.
