Ҳижрий 8 йил, милодий 629 йил мусулмонлар билан Рум (Византия) ва уларнинг иттифоқчилари Ғассонийлар ўртасида муъта ғазоти юз берди. Пайғамбар алайҳиссалом Ҳорис ибн Умайр Аздийдан Бусро ҳокимига мактуб жўнатдилар. Ҳорис Муъта деган кентга етиб келганда Шураҳбил ибн Амр Ғассоний деган кимса учраб қолди. У элчидан қаерга кетаётганини сўради. Ҳорис Шомга йўл олганинини айтди. Шураҳбил: «Сен Муҳаммаднинг элчиси бўлсанг керак-а?» деб сўради. Ҳорис тасдиқ жавобини берган заҳоти ўлдирилди. Пайғамбар алайҳиссалом бу хабарни эшитиб, қаттиқ қайғурдилар. Шу пайтгача у кишининг бирон элчиси ҳалок бўлмаган эди.
Ҳижрий 4 йил, милодий 626 йил Зайнаб бинти Али ибн Абу Толиб, тўртинчи рошид халифа Али ибн Абу Толибнинг қизлари ва Пайғамбар Муҳаммад соллаллоҳу алайҳи васалламнинг набиралари таваллуд топди.
Ҳижрий 398 йил, милодий 1008 йил мағрибдаги Бану Зирий давлатининг амирларидан бири Муъиз ибн Бадис таваллуд топди.
Ҳижрий 8 йил, милодий 629 йил Пайғамбар Муҳаммад соллаллоҳу алайҳи васалламнинг амакиваччалари ва Исломни илк қабул қилган саҳобалари Жаъфар ибн Абу Толиб розияллоҳу анҳу вафот этдилар. .
Ҳижрий 982 йил, милодий 1574 йил Усмонлилар давлатининг шайхулисломи Муҳаммад Абу Суъуд Афанди вафот этдилар.
Ҳижрий 1003 йил, милодий 1595 йил Усмонлилар давлатининг ўн иккинчи султони.Мурод III вафот этди.
Ҳижрий 861 йил, милодий 1457 йил Мамлук қўшинлари Ибн Қарамон (Қараманоғуллари амирлиги)га қарши юриш учун Қоҳира яқинидаги Райдания қишлоғига тўпланди.
Ҳижрий 872 йил, милодий 1467 йил Қоҳирада сиёсий тўнтариш, яъни мамлук амирларидан Яшбак бошчилигида ҳарбийлар қуролланиб чиқишди. Натижада мамлук султони Зоҳир Ялбай тахтдан ағдарилиб, унинг ўрнига Зоҳир Тимурбуғо ўтирди.
Ҳижрий 1375 йил, милодий 1955-1956 йиллар Судан Парламенти мустақиллик декларациясини қабул қилди. Кучга кириши 1956 йил 1 январ куни амалда қўлланилди.
Ҳижрий 671 йил, милодий 1273 йил мамлук қўшинлари Фурот дарёсидан кечиб ўтиб, илҳонли-мўғул кучлари ҳужумини қайтарди ва уларга катта талафот етказди.
