Тушимизга кирган инсон Расулуллоҳ соллаллоҳу алайҳи васаллам эканликларини қаердан биламиз?

3 йил аввал 3391 siyrat.uz

 

Савол: Тушимизга кирган инсон Расулуллоҳ соллаллоҳу алайҳи васаллам эканликларини қаердан биламиз?

Жавоб: Бисмиллаҳир Роҳманир Роҳийм. Алҳамдулиллаҳи ваҳдаҳ, вассолату вассаламу ъала ман ла набийя баъдаҳ. Ассалому алайкум ва роҳматуллоҳи ва барокатуҳ.

Мусулмон одам тушида Пайғамбаримиз Муҳаммад соллаллоҳу алайҳи васалламни шариатда маълум бўлган, суннатда собит бўлган сифатлар билан кўриши ҳақиқатдир.

Зеро, шайтон бошқаларнинг шаклига кира олса ҳам, Пайғамбаримиз соллаллоҳу алайҳи васалламнинг қиёфаларида кўрина олмайди. Бу ҳақда Суюклигимизнинг ўзлари: «Ким мени тушида кўрса, ҳақиқатда у мени кўрибди (демак, у ҳақиқатни кўрибди). Бас, албатта, шайтон менинг қиёфамда кўрина олмайди», деганлар[1].

Қози Иёз раҳматуллоҳи алайҳи ушбу ҳадис шарҳида: «Агар у Пайғамбаримиз соллаллоҳу алайҳи васалламни ҳаётликларидаги сифатларга мувофиқ кўрган бўлса, у ҳақиқатни кўрибди», деганлар[2].

Ибн Сирин ҳам: «Агар у Пайғамбаримизни ўз суратларида кўрган бўлса», деганлар[3].

Осим ибн Кулайбнинг отаси айтади: «Мен Ибн Аббос розияллоҳу анҳуга: «Тушимда Пайғамбаримизни кўрдим», дедим. У: «Менга у кишини сифатлаб бер», деди. Шунда мен имом Ҳасан ибн Алини эслаб, уни у Зотга ўхшатган эдим, Ибн Аббос: «Ҳақиқатан, сен у Зотни кўрибсан», деб жавоб берди[4].

Бирор киши Ибн Сирин раҳматуллоҳи алайҳининг олдига келиб: «Мен тушимда Пайғамбаримизни кўрдим», деса: «Қани менга ўша кишини сифатлаб бер», дерди. Агар у Ибн Сирин билмайдиган сифатлар билан васф қилса: «Сен у Зотни кўрмабсан», деб айтарди[5].


[1] Икки Шайх, Асҳоби Сунан ва Аҳмад ибн Ҳанбаллар ривояти.

[2] «Икмолул муаллим шарҳу саҳиҳи Муслим», 7/111.

[3] Бухорий ривояти.

[4] Ҳоким ривояти, санади жаййид («Фатҳул Борий», 12/384).

[5] Санади саҳиҳ.




Мавзуга оид мақолалар
Тарихда бугун
Робиъул-аввал ойининг 17-куни
  • Ҳижрий 950-йил 17-робиъул-аввал куни (милодий 1543-йил 20-июн) Усмонлилар ҳарбий денгиз флоти Барбароса қўмондонлигида Ситсилия ва Италиянинг баъзи қирғоқларини ва Типпер дарёсида жойлашган Остия портини қўлга киритади.
  • Ҳижрий 1110-йил 17-робиъул-аввал куни (милодий 1697-йил 25-май) Усмонлилар ҳарбий денгиз флоти Ўрта ер денгизидаги Медела оролининг жанубида бўлган жангда Винеция ҳарбий денгиз флотини мағлуб этди. Бу жангда 2500га яқин винециялик ҳарбийлар ҳалок бўлди.
 


Китоблар
ИСЛОМ.УЗ ПОРТАЛИНИНГ САЙТЛАРИ