Расулуллоҳ соллаллоҳу алайҳи васалламнинг болалик вақтлари жоҳилият даври бўлиб, Аллоҳ у Зотни ўша даврдаги гуноҳ ишлардан сақлаб борарди. Бу тўғрида ўзлари шундай деганлар: «Бир куни болалар билан тош ташиётган эдик. Ҳамма болалар иштонларини ечиб, елкаларига қўйишар, унинг устига тошни қўйишарди. Мен ҳам улар билан шундай бориб-келаётсам, тўсатдан биров мени шапалоқлаб урди. Аммо мен уни кўрмадим. Сўнг: «Иштонингни кийиб ол», – деди. Шунда иштонимни елкамдан олдим-да, кийиб олдим. Ўртоқларим ичида фақат менгина кийимли ҳолда тошларни елкамда таший бошладим».