Салмон сўзида давом этди: «Мен янги руҳонийдан кўра кўпроқ ибодат қилувчи, дунёдан воз кечган, охиратга рағбатли ҳамда туну кун ибодатга берилган кимсани кўрмаган эдим. Шу боисдан мен уни жуда ҳам яхши кўриб, у билан узоқ вақт бирга қолиб кетдим. Сўнг унинг ҳам ўлим соати яқинлашди. Мен унга: «Мен сиз билан узоқ вақт бирга бўлдим, сизга жуда қаттиқ муҳаббат қўйдим. Аммо кўриб турганингиздек, сизга Аллоҳнинг ҳукми яқин турибди. Ўзингиздан кейин кимга боришимни васият қиласиз, мени нимага буюрасиз?» – дедим. У: «Ўғлим, тангрига қасамки, мен бу кунларда бирорта ўзимдек кимсани билмайман. Чунки одамлар залолатга кетиб, бу диндаги кўп нарсаларни ўзгартириб юборганлар, аммо Мавсил деган жойда бир кишини биламан, у ҳам мендек ҳақ динда, сен унинг ёнига бор», – деб маслаҳат берди».
