Робиъул-аввал ойининг 2-куни
Ҳижрий 897-йил 2-робиъул-аввал куни (милодий 1492-йил 2-январ) мусулмонларнинг охирги қалъаси бўлган Гранада (Ғарната) насронийлар қўлида яксон қилинди.Ҳижрий 1367-йил 2- робиъул-аввал куни (милодий 1948-йил 18-январ) Муҳаммад Маъмун Шановий Азҳар университети шайхи деб сайланди. У киши Азҳар университети шайхлари силсиласининг 32-вакили ҳисобланади.
Хаттоб Зайдга азият бериб, охири уни Макканинг юқори томонига чиқариб юборган эди. У Макка қаршисида Ҳиро ғорига жойлашган эди. Хаттоб Макканинг ёш, авбош йигитларидан бир нечасига: «Уни Маккага киритманглар», деб буюрди. Зайд Маккага яширинча кирар эди. Борди-ю, улардан бирортаси кўриб қолгудек бўлса, дарҳол Хаттобга хабар берар, у эса Зайдга озор берарди. Динларини бузиши ёки бирорта одам Зайдга эргашиб кетишидан қўрқиб, уни шаҳардан чиқариб юборар эдилар. Зайд шаҳарнинг ҳурматини бузган қавмдошларига қарши ўлароқ, Макканинг ҳурматини сақлар эди.
Кейин у Иброҳим алайҳиссалом динини истаб, роҳиблар, олимлардан сўраб-суриштириб бутун Арабистон ўлкасини кезиб, Мавсил шаҳригача етиб борди. Шомни бошдан-охир айланиб чиқди. Ниҳоят, Балқо минтақасида Майфаъа деган жойда бир роҳибни учратди. Айтишларича, у насронийларнинг барча илмларини тўлиқ эгаллаган одам эди. Зайд ундан Иброҳим алайҳиссалом дини бўлмиш ҳанифлик ҳақида сўради. Шунда роҳиб: «Сен бугун бирорта одам эътиқод қилмайдиган бир динни қидирмоқдасан, лекин ҳозир ўзингнинг келган юртингдан чиқадиган бир Пайғамбар даври келди. Бу Пайғамбар Иброҳимнинг ҳанифлик динини олиб келади. Сен ўшанга эргаш. У ҳозир Пайғамбар қилиб юборилган. Бу вақт унинг замонидир», – деди. Зайд яҳудийлик ҳамда насронийликка кириб кўрган, улардан ҳеч бирига рози бўлмаган эди. Роҳиб унга мазкур сўзларни айтиши билан дарҳол йўлга чиқиб, Маккага қараб кетди. Лахмийлар ерининг ўртасига етганда, Зайдга тажовуз қилиб ўлдирдилар.
