Умар ибн Хаттобнинг мусулмон бўлиши

Ибн Исҳоқ: Амр ибн ал-Ос ва Абдуллоҳ ибн Абу Рабиъа Расулул-лоҳ соллаллоҳу алайҳи васалламнинг саҳобаларини олиб келиш борасида бирор натижага эриша олмай, Нажоший улар истамаган шаклда рад жавобини бериб Маккага қайтишганида Умар ибн ал-Хаттоб Исломни қабул қилди. У кучли, орқасидаги нарсага парво қилмайдиган довюрак киши эди. Расулуллоҳ соллаллоҳу алайҳи васалламнинг саҳобалари Умар ва Ҳамза билан ҳимояланиб, ҳатто Қурайшдан кучайиб кетдилар. Абдуллоҳ ибн Масъуд: «Биз Умар Исломни қабул қилмагунича каъбанинг ёнида намоз ўқий ол­мас эдик. У мусулмон бўлгач, қурайшликлар билан уришиб, охири Каъбанинг олдида намоз ўқийдиган бўлди, биз ҳам Умар билан бирга ўқидик», – деб айтар эди. Умарнинг мусулмон бўлиши Расулуллоҳ соллаллоҳу алайҳи васаллам саҳобаларининг бир гуруҳи Ҳабашистонга чиқиб кетганлари­дан сўнг бўлган эди.

Ал-Баккоий: «Менга Мисъар ибн Кидом Саъд ибн Иброҳимдан ривоят қилиб айтишича, Абдуллоҳ ибн Масъуд: «Умарнинг Ислом­га кириши – фатҳ149, ҳижрати – нусрат150, амирлиги – раҳмат бўлган эди. Умар Исломни қабул қилмагунича Каъбанинг ёнида намоз ўқий олмаган эдик. Мусулмон бўлгач, Қурайш билан уришиб, Каъбанинг олдида намоз ўқийдиган бўлди. Биз ҳам у билан бирга намоз ўқидик», – деган эди.