Шунда Расулуллоҳ соллаллоҳу алайҳи васаллам сўз олиб, Қуръон тиловат қилиб бердилар. Аллоҳга иймон келтиришга чақириб, Исломга тарғиб қилдилар. Сўнгра: «Аёлларингиз ва болаларингизни ҳимоя қиладиган нарсалардан мени ҳам ҳимоя қилишингиз учун сизлардан байъат (сўз) оламан», – дедилар. Шунда ал-Бароъ ибн Маърур Расулуллоҳ соллаллоҳу алайҳи васалламнинг қўлидан ушлаб: «Ҳа, Сизни Пайғамбар қилиб юборган Зотга қасамки, аёлларимизни ҳимоя қилган нарсалардан сизни ҳам ҳимоя қиламиз. Эй Аллоҳнинг Расули! Аллоҳга қасамки, биз жанговар кишиларимиз, қурол ва зирх аҳлимиз. Бу одатни улуғларимиздан мерос қилиб олганмиз», – деди. Ал-Бароъ Расулуллоҳ соллаллоҳу алайҳи васалламга гапириб турганида Абул Ҳайсам ибн ат- Таййиҳон сўзга аралашиб шундай деди: «Эй Аллоҳнинг Расули! Биз ва яҳудийлар ўртасида келишув бор. Биз уни бузамиз. Биз шундай қилсаг-у, Сўнгра Аллоҳ сизни ғолиб қилса, қавмингизга қайтиб бизни ташлаб кетмайсизми?» – деди. Шунда Расулуллоҳ соллаллоҳу алайҳи васаллам табассум қилиб: «Асло, қоним қонингиз, зимматим (мажбуриятим) зимматингиздир237. Мен сизларданман, сизлар эса мендансиз. Сиз ким билан жанг қилсангиз, мен ҳам у билан жанг қиламан, ким билан муроса қилсангиз, мен ҳам у билан муроса қиламан», – дедилар.
Каъб ибн Молик: «Расулуллоҳ соллаллоҳу алайҳи васаллам менга: «Ичингиздан қавмига кафил бўлишлари учун ўн икки вакилни чиқаринг», – дедилар. Шунда улар тўққизи Хазраждан, учтаси Авсдан бўлган ўн икки вакилни чиқаришди».
