Ибн Исҳоқ: Аллоҳ ўз Пайғамбари соллаллоҳу алайҳи васалламга жанг қилишга рухсат берган вақтда саҳобалардан уруш қилишга олган байъатларининг шартлари биринчи ақабада уларга юклатилган шартлардан ўзгача эди. Биринчи ақаба аёллар байъати усулида бўлиб, Расулуллоҳ соллаллоҳу алайҳи васалламга ҳали жанг қилиш учун рухсат берилмаганди. Аллоҳ жангга рухсат бериб, Расулуллоҳ соллаллоҳу алайҳи васаллам охирги Ақаба байъатида қизил ва қора танли (ҳар қандай кишилар)га қарши жанг қилишга байъат олар эканлар, ўзлари ва Аллоҳ учун қавмдан сўз олдилар ва бунга вафо қилганларга жаннатни ваъда қилдилар.
Ибн Исҳоқ: Убода ибн ал-Валид ибн ас-Сомит отаси ал-Валиддан, у эса вакиллардан бири бўлган бобоси Убода ибн ас-Сомитдан менга шуларни ривоят қилди: «Биз Расулуллоҳ соллаллоҳу алайҳи васалламга уруш байъати бердик (Убода биринчи Ақабада Пайғамбарга аёллар байъати берган ўн икки кишидан бири эди). Енгиллик ва машаққат, хуш ёққан ва ёқмаган пайтларда, бошимизга нима келса ҳам, эшитиб итоат этишга, қаерда бўлсак ҳам, иш эгасига қарши чиқмасликка, Аллоҳ йўлида ҳеч бир маломатчининг маломатидан қўрқмай ҳақиқатни айтишга байъат бердик».
