Итбон ибн Молик ва Аббос ибн Убода ибн Надлалар Бани Солим ибн Авфдан бир гуруҳ киши билан келишиб: «Ё Расулуллоҳ соллаллоҳу алайҳи васаллам, сонимизга ва қувватимизга ишониб ҳимояланган ҳолда биз билан яшанг», – дейишди. Расулуллоҳ соллаллоҳу алайҳи васаллам: «Туянинг йўлини очиб қўйинг, зеро унга буюрилгандир», – дедилар. Шунда улар туянинг йўлини бўшатиб қўйишди. Бани Баёда маҳалласи тўғрисига келганда Бани Баёдадан Зиёд ибн Лабийд ва Фарва ибн Амрлар қавмидан бир гуруҳи билан пешвоз чиқиб: «Ё Расулуллоҳ соллаллоҳу алайҳи васаллам, бизникига келинг. Орамизда сонимиз ва қувватимиз билан ҳимояланган ҳолда яшанг», – дейишди. Лекин уларга ҳам: «Унинг йўлини ўз ҳолига қўйинг, чунки унга буюрилган», – дедилар. Улар ҳам туянинг йўлини очиб қўйишди, туя йўлида давом этди. Бани Соъида маҳалласи олдидан ўтганда Бани Соъидадан Саъд ибн Убода ва ал-Мунзир ибн Амрлар қавмидан бир гуруҳи билан кутиб олишди. Шунда улар ҳам: «Ё Расулуллоҳ соллаллоҳу алайҳи васаллам, қани, бизга келинг, сонимиз, қувватимиз билан ҳимояланган ҳолда биз билан яшанг», – дейишди. Расулуллоҳ соллаллоҳу алайҳи васаллам: «Йўлини холи қўйинг, чунки унга амр этилгандир», – дедилар. Улар ҳам туянинг йўлини очиб қўйишди, туя йўлида давом этди. Бани Ҳорис ибн ал-Хазраж маҳалласи рўпарасига келганда Бани Ҳорис ибн ал-Хазраждан Саъд ибн ар-Рабиъ, Хорижа ибн Зайд ва Абдуллоҳ ибн Равоҳалар қавмидан бир гуруҳ кишилар билан пешвоз чиқиб: «Ё Расулуллоҳ соллаллоҳу алайҳи васаллам, мана, бизга келинг, сонимиз ва қувватимиз билан ҳимояланган ҳолда биз билан қолинг», – дейишди. Расулуллоҳ соллаллоҳу алайҳи васаллам: «Унинг йўлини холи қўйинг, чунки унга амр этилган», – дедилар. Шу билан унинг йўлини холи қўйишди ва туя йўлида давом этди. Абдумутталибнинг онаси Салмо бинт Амр томонидан тоғалари бўлмиш Бани Адий ибн ан-Нажжор маҳалласидан ўтганларида Бани Адий ибн ан-Нажжордан Салийт ибн Қайс ва Абу Салийт Усайра ибн Абу Хорижалар қавмидан бир гуруҳи билан пешвоз чиқиб: «Ё Расулуллоҳ соллаллоҳу алайҳи васаллам, тоғаларингиз ёнига келинг, сонимиз ва қувватимиз билан ҳимояланган ҳолда биз билан яшанг», – дейишди. Расулуллоҳ соллаллоҳу алайҳи васаллам: «Туянинг йўлини холи қўйинг, чунки унга буюрилган», – дедилар. Шунда улар туянинг йўлини бўшатиб беришди ва у йўлда давом этди.
