Ибн Исҳоқ: Абу Умома Асъад ибн Зурора масжид қурилаётган ойларда юрак хуружи ёки бўғмадан вафот этди.
Ибн Исҳоқ: Абдуллоҳ ибн Абу Бакр ибн Муҳаммад ибн Амр ибн Ҳазм, Яҳё ибн Абдуллоҳ ибн Абдураҳмон ибн Асъад ибн Зурорадан менга шуларни ривоят қилди: «Расулуллоҳ соллаллоҳу алайҳи васаллам: «Абу Умома қандай ҳам нораво ўликдир. Яҳудийлар ва араб мунофиқлари «Агар Муҳаммад Пайғамбар бўлганида дўсти ўлмас эди», дейишади. Мен на ўзим ва на дўстим учун Аллоҳнинг тақдиридан бирон нарсани ўзгартиришга қодир эмасман», – дедилар.
Ибн Исҳоқ: Осим ибн Умар ибн Қатода ал-Ансорий менга шуларни ривоят қилди: «Абу Умома Асъад ибн Зурора вафот этгач, Бани Нажжор йиғилиб Расулуллоҳ соллаллоҳу алайҳи васалламнинг олдиларига келишди. Абу Умома уларнинг вакили эди. Улар: «Ё Расулуллоҳ соллаллоҳу алайҳи васаллам! Унинг орамиздаги мавқеини билардингиз. Орамиздан унинг вазифасини бажарадиган бир кишини вакил қилинг», – дейишди. Шунда Расулуллоҳ соллаллоҳу алайҳи васаллам: «Сиз менинг тоғаларимсиз. Сиздаги фазилатлар туфайли мен сизнинг вакилингизман», – дедилар. Бу билан Расулуллоҳ соллаллоҳу алайҳи васаллам баъзиларини бошқаларидан устун қўйишни хуш кўрмаган эдилар. Сонлари кўплиги билан фахрланувчи Бани Нажжорнинг янги фазилатларидан яна бири Расулуллоҳ соллалоҳу алайҳи васалламнинг уларга вакил бўлишлари бўлди.
