Мухайриқ қиссаси

3 йил аввал 2063 siyrat.uz

Ибн Исҳоқ: Мухайриқ илмли, доно ва катта хурмозорларга эга бой одам эди. У Расулуллоҳ соллаллоҳу алайҳи васалламнинг сифатлари ва ўқиган нарса­лари ҳақида билса-да, одат бўлиб қолган динидан воз кечолмасди. Бу ҳол Уҳуд кунигача давом этди. Уҳуд куни шанба кунга тўғри кел­ди. Ўша куни у: «Эй яҳудийлар жамоаси! Аллоҳга қасамки, сизлар Муҳаммадга ёрдам беришингиз керак эканлигини, унинг дини сиз­лардан ғолиб келишини биласизлар», – деди. Улар: «Бугун шанба», – дедилар. У: «Сизларга ҳеч қандай шанба йўқ», – деди-да, қуролини олиб чиқиб кетди. Сўнг Уҳудда турган Расулуллоҳ соллаллоҳу алайҳи васалламнинг олдиларига бориб, ортида турган қавмига: «Агар мен бугун ҳалок бўлсам, бойлигим Муҳаммад соллаллоҳу алайҳи васалламгадир, Аллоҳ нимани хоҳласа, шундай қилсин», – деди ва жанг бошлангач, жангга кириб ҳалок бўлди. Расулуллоҳ соллаллоҳу алайҳи васаллам у ҳақида: «Мухайриқ яҳудийларнинг яхшиси эди», – дер эдилар. Шундай қилиб, Расулуллоҳ соллаллоҳу алайҳи васаллам унинг бойли­гини олдилар, Мадинадаги ерлардан келадиган фойдаларнинг асосий қисми унинг ерларидан эди.

Ибн Исҳоқ: Абдуллоҳ ибн Абу Бакр ибн Муҳаммад ибн Амр

ибн Ҳазм менга хабар беришича, София бинт Ҳуяй ибн Ахтаб ўзи ҳақида шундай деди: «Мен отам ва амаким Абу Ёсирнинг энг яхши кўрадиган фарзандлари эдим. Қачон уйга келишса, бошқа бо­лаларидан ҳам кўра мени кўпроқ эркалашар эди. Расулуллоҳ соллаллоҳу алайҳи васаллам Мадинага келиб, Бани Амр ибн Авфдаги Қубога тушгач, отам Ҳуяй ибн Ахтаб ва амаким Абу Ёсир ибн Ахтаб тонг қоронғусида у ки­шининг ҳузурларига боришди. У ердан қуёш ботаётганда чарчаган, бўшашган, йиқилиб тушадиган даражада судралган ҳолда қайтиб ке­лишди. Ҳар сафаргидай мен уларнинг олдига жилмайган ҳолда югу­риб чиқдим. Аллоҳга қасамки, ғамгинликлари боис улар менга бу­рилиб ҳам қарашмади. Мен уларнинг суҳбатларини эшитдим: «Отам Ҳуяй ибн Ахтабга амаким Абу Ёсир: «У ўшами?» – деди. Отам: «Аллоҳга қасамки, ҳа», – деди. Амаким: «Аниқ ўша эканлигига ий­монинг комилми?» – деди. Отам: «Ҳа», – деб жавоб берди. Амаким: «Қалбингда унга нисбатан нима бор?» – деди. Отам: «То тирик экан­ман, адоват!» – деди.




Мавзуга оид мақолалар
Тарихда бугун
Робиъул-аввал ойининг 17-куни
  • Ҳижрий 950-йил 17-робиъул-аввал куни (милодий 1543-йил 20-июн) Усмонлилар ҳарбий денгиз флоти Барбароса қўмондонлигида Ситсилия ва Италиянинг баъзи қирғоқларини ва Типпер дарёсида жойлашган Остия портини қўлга киритади.
  • Ҳижрий 1110-йил 17-робиъул-аввал куни (милодий 1697-йил 25-май) Усмонлилар ҳарбий денгиз флоти Ўрта ер денгизидаги Медела оролининг жанубида бўлган жангда Винеция ҳарбий денгиз флотини мағлуб этди. Бу жангда 2500га яқин винециялик ҳарбийлар ҳалок бўлди.
 


Китоблар
ИСЛОМ.УЗ ПОРТАЛИНИНГ САЙТЛАРИ