Расулуллоҳ соллаллоҳу алайҳи васаллам Равҳонинг қудуғи жойлашган Сажсажда қўним топдилар. Сўнгра у ердан жўнаб Мунсарифга етганларида Макканинг йўлини чап тарафда қолдириб, ўнг томондан Бадрга бориш учун Нозияга қараб юрдилар, у ерда Нозия билан Сафро довони ўртасидаги Раҳқон деган водийни кесиб ўтдилар. Сўнг довонга кўтарилдилар, кейин у ердан тушаётиб Сафрога яқин қолганларида Бани Соиданинг иттифоқдоши Басбас ибн ал-Жуҳаний ва Бани Нажжорнинг иттифоқдоши Адий ибн Абу Зағбо ал-Жуҳанийни Абу Суфён ибн Ҳарб ва бошқалар ҳақида хабар топиб келиш учун Бадрга юбордилар. Уларни жўнатиб, ўзлари ҳам юришда давом этдилар, Сафрога402 етганларида у ердаги аҳолидан иккала тоғнинг номи ҳақида сўрадилар. Улар: «Буниси Мусаллаҳ (қуролланган), буниси Муриъ (ёзилувчи, ичини бўшатувчи, нажас) деб номланади», – дейишди. Сўнг уларнинг аҳолиси ҳақида сўраган эдилар, Бани Ғифорнинг икки уруғи Бани Нор (олов уруғи) ва Бани Ҳуроқ (пилик уруғи) эканлигини айтишди. Расулуллоҳ соллаллоҳу алайҳи васаллам икки тоғ ва аҳолисининг номини ёмонликка йўйган ҳолда у ердан ўтишни маъқул кўрмадилар. Сўнг тоғни ва Сафрони чап томонда қолдириб, ўнг тараф билан Зафрон деган водийни кесиб ўтдилар.
