Сўнг Расулуллоҳ соллаллоҳу алайҳи васаллам Зафрондан ал-Асофир деган довондан юриб, у ердан пастга қараб ад-Дабба деб номланган шаҳарга тушдилар, Ҳаннон (катта тоғдек баланд қумтепалик) ўнг тарафларида қолди, сўнг Бадрга яқин жойда қўним топдилар.
Расулуллоҳ соллаллоҳу алайҳи васаллам билан саҳобаларидан бир киши юришда давом этди.
Ибн Ҳишом: ўша бир киши Абу Бакр Сиддиқ эди.
Ибн Исҳоқ: менга Муҳаммад ибн Яҳё ибн Ҳиббон айтди: «Улар бир бадавий қариянинг олдида тўхтаб, Қурайш ҳамда Муҳаммад ва унинг саҳобалари ҳақида қандай хабарга эга эканлиги хусусида сўрадилар. Қария: «Ўзингиз ким эканлигингизни айтмагунингизча айтмайман», – деди. Расулуллоҳ соллаллоҳу алайҳи васаллам: «Агар сен айтсанг, кейин биз ҳам айтамиз», – дедилар. У: «Тескариси экан-да?» – деди. Расулуллоҳ соллаллоҳу алайҳи васаллам: «Ҳа», – дедилар. У: «Менга етиб келишича, Муҳаммад ва унинг асҳоблари фалон-фалон куни йўлга чиқишибди. Менга хабар берган одам рост айтган бўлса, бугун улар фалон-фалон жойда», – дея Расулуллоҳ соллаллоҳу алайҳи васаллам тушган жойни айтди. У яна: «Менга етиб келган хабарга кўра, Қурайш фалон фалон куни йўлга чиқибди. Менга хабар берган одам янглишмаган бўлса, бугун улар фалон-фалон жойда», деб Қурайш турган жойни айтди. Хабар бериб бўлгач: «Ўзингиз қаердансиз?» – деб сўради. Расулуллоҳ соллаллоҳу алайҳи васаллам: «Сувданмиз (сувдан яралганмиз)», – дея ортга қайтдилар. Қария: «Қайси сувдан? Ироқнинг сувиданми?» – деб сўраганча қолаверди.
Ибн Ҳишом: қария Суфён ад-Дамрий эди.
