Расулуллоҳ соллаллоҳу алайҳи васалламнинг Мадинага ҳижратлари

Расулуллоҳ соллаллоҳу алайҳи васаллам ҳазрати Абу Бакрга келиб «Аллоҳ менга ҳижрат изнини берди»-дедилар. Ҳазрати Абу Бакр «Эй Расулуллоҳ! Сиз билан ҳамроҳ бўлайми?»− деб сўради.Расулуллоҳ унинг таклифини қабул қилганларида, Абу Бакр хурсанд бўлиб йиғлади. Дарҳол сафарга ҳозирлаб қўйган икки туясини келтирди. Абдуллоҳ ибн Урайқитни йўл кўрсатувчи қилиб ёллаган эди. Расулуллоҳ соллаллоҳу алайҳи васаллам Маккада туриб, ҳазрати Алига ёнидаги омонатларни соҳибларга беришлиги учун амр бердилар; зеро Маккада қийматли ашёлар Расулуллоҳга омонат қилинарди. Чунки ул Зот тўғри ва ишончли бир киши эдилар.