Робиъул-аввал ойининг 25-куни
- Ҳижрий 13-йил 25-робиъул-аввал куни (милодий 634-йил 30-май) мусулмонлар Шомнинг Бусро шаҳрини Холид ибн Валид қўмондонлигида фатҳ қилдилар ва бу Ислом тарихидаги Шомга бўлган биринчи фатҳ ҳисобланади.
- Ҳижрий 306-йил 25-робиъул-аввал куни (милодий 918-йил 5-сентябр) Шофеъий мазҳабининг катта фақиҳи Аҳмад ибн Умар ибн Сурайж вафот этди. У зот Шофеъий мазҳабини тарқалишида ўзининг катта ҳисссасини қўшган олимлардан бири ҳисобланади.
- Ҳижрий 1329-йил 25-робиъул-аввал куни (милодий 1911-йил 5-апрел) шайх Муҳаммад Мутавалли Шаъровий таваллуд топди. Бу зот 20-аср Ислом оламининг кўзга кўринган забардаст олимларидан бўлган.
Бани Саъд ибн Бакр қабиласининг элчилиги бир киши – Зимом ибн Саълабадан иборат эди. У ўз қавмининг ҳузурига даъватчи бўлган ҳолида қайтди. Унинг биринчи айтган гаплари қуйидагилардан иборат эди: «Лот ва Уззо қандай ҳам ёмон бўлди!» деди у. «Тўхта! Эй Зимом! Пес бўлиб қолишдан қўрқ! Мохов бўлиб қолишдан қўрқ! Мажнун бўлиб қолишдан қўрқ!» дейишди қавми. У бўлса: «Шўрингиз қурисин! Аллоҳга қасамки, бу иккови зарар ҳам, наф ҳам бера олмайдилар. Албатта, Аллоҳ Расул юборди. Унга Китоб нозил қилди. У Зот у билан сизни ўзингиз мубтало бўлган нарсадан қутқариб олади. Албатта, мен шоҳидлик бераманки, албатта, Аллоҳдан ўзга ибодатга сазовор Зот йўқ. У Ўзи ёлғиздир. Унинг шериги йўқ. Албатта, Муҳаммад Унинг бандаси ва Расулидир. Батаҳқиқ, мен сизга унинг ҳузуридан у Зот амр ва наҳий қилган нарсалар ила келдим», деди. Ўша куни унинг юртидаги барча эркагу аёл мусулмон бўлди.
