Ибн Ҳишом: менга илм аҳлидан бир кишининг айтишича, Амр ибн Луҳай Маккадан Шомга баъзи ишлари билан йўлга чиқди. У Балқо еридаги имлоқийлар яшайдиган Маоб деган жойга етди. Имлоқ – Ловиз ибн Сом ибн Нуҳ ўғлидир. Ибн Луҳай имлоқийларнинг бутларга ибодат қилишаётганини кўриб, уларга: «Сизлар нимага сиғинаяпсизлар?» – деди. Улар: «Булар биз ибодат қиладиган бутлар бўлиб, улардан ёмғир сўрасак, ёмғир берадилар, ёрдам сўрасак, ёрдам берадилар», – дейишди. Шунда Ибн Луҳай: «Менга бут-санамлардан бирортасини бера олмайсизларми? Мен уни араблар юртига олиб борардим, улар ҳам шунга ибодат қилишарди», – деди. Шунда имлоқийлар Ибн Луҳайга «Ҳубал» деб аталувчи бир санамни бердилар. Ибн Луҳай уни Маккага олиб келиб ўрнатди ва одамларга унга ибодат қилиш, уни улуғлашни буюрди.
