Ибн Исҳоқ: Суфа уруғи одатига кўра бошчилик қилаётганида, Қусай ибн Килоб уларнинг олдига Қурайш, Кинона ва қудоъалик кишилар билан бирга келиб: «Бу ишга сизлардан кўра биз ҳақлироқмиз», – деди. Шу тариқа ўртада низо бошланиб, икки орада қаттиқ жанг бўлди. Унда Суфа уруғи енгилиб, Қусай ғолиб келди.
Буни кўрган Хузоъа ва бани Бакр қабилалари Қусайдан ҳимояланиш чорасини излай бошладилар. Улар Қусайнинг ўзларини Каъба ва Макка ишига бошчиликдан маҳрум қилишини билиб қолдилар. Шунда Қусай уларга қарши уруш эълон қилди. У билан бирга укаси Ризоҳ ибн Рабиъа ҳам жанг қилишга тайёр турарди. Шундан сўнг икки тараф «Абтаҳ» деган жойда тўқнашдилар. Ҳар икки томондан ҳам кўплаб қурбонлар берилди. Ғолиб аниқ бўлмагач, сулҳ қилишга ва ўзларига араблардан бир кишини бошлиқ кўтаришга келишиб олдилар. Икки томон ҳам Яъмар ибн Авф ибн Каъб ибн Омир ибн Лайс ибн Бакр ибн Абдуманот ибн Кинона деган кишини бошлиқ қилиб сайладилар. У шундай ҳукм чиқарди: «Каъба ва Маккага бошчилик қилишга Хузоъадан кўра Қусай ҳақли ва лойиқроқдир. Хузоъа ва бани Бакр томонидан Қусайга етказилган зарарлар кечиб юборилади. Аммо Хузоъа ва бани Бакрга эса Қурайш, Кинона ва Қудоъалар томонидан етказилган зарарлар ундирилади». Шунинг учун Яъмар ибн Авф «аш-Шаддох», яъни «бекор қилувчи» деб аталди. Чунки у Қусайга етказилган зарарларни бекор қилган эди.
Ибн Ҳишом: уни «аш-Шудох» ҳам дейишади.
