Шиҳобуддин Қасталоний

(«Ал-мавоҳибул ладуния фи минаҳил Муҳаммадия» асари муаллифи)

Абул Аббос Шиҳобуддин Аҳмад ибн Муҳаммад ибн Абу Бакр Қасталоний ҳижрий 851 (мил. 1448) йили Мисрда таваллуд топган. Ёшлик чоғида Қуръони карим ҳамда имом Шотибийнинг «Ҳирзул амоний»номли машҳур назмий  асарини ёд олган. Умар ибн Қосим Ансорийдан етти қироатни ўрганган. Шунингдек, ҳадис, тарих ва фиқҳ илмини замонасининг энг етук уламоларидан ўрганган. Устози имом Нашовий ҳузурида «Саҳиҳул Бухорий»дан дарс олиб, уни беш марта ўтиришда охиригача ўқиб тугаллаган.Маккада истиқомат қилиб, у ердаги илм мажлисларида ҳам қатнашган. Кейин Мисрга қайтиб, у ерда умрининг охиригача дарс бериш, китоб таълиф қилиш ҳамда «Абул Аббос Ғумрий» жомеъида кўплаб инсонларга ваъз қилиш билан машғул бўлган. Китоблари: «Иршодус сорий ли шарҳи саҳиҳил Бухорий» (10 жуз); «Минҳожул ибтиҳож би шарҳи Муслим ибн Ҳажжож» (8 жуз); «Ал-мавоҳибул ладуния фи минаҳил Муҳаммадия»; «Машориқул анворил музийя фи мадҳи хойрил барийя» («Қасидаи бурда»нинг шарҳи); «Фатҳуд доний фи шарҳи Ҳирзил амоний»; «Латоифул ишорот фи илмил қироот»; «Ар равзуз зоҳир фи маноқибиш Шайх Абдулқодир...» Шиҳобуддин Қасталоний ҳижрий 923 (мил. 1517) йили 7 муҳаррам жума куни кечаси Қоҳирада вафот этди. Ўша куни «Азҳар» жомеъида жума намозидан сўнг унга жаноза намози ўқилган.