40 ёшда

3 йил аввал 3656 siyrat.uz

40 ёшда.

Ибн Исҳоқ: «Расулуллоҳ соллаллоҳу алайҳи васаллам Хадижа розияллоҳу анҳога уйланган вақтда, Хадижа онамиз 28 ёшда бўлганлар», деган гапни айтган. Лекин бу ривоятнинг исноди йўқ.

Ибн Касир «Ал-бидоя ван-ниҳоя» китобида 35 ёшни зикр қиладилар. Бу маълумот ҳам саҳиҳ эмас.

«Хадижа розияллоҳу анҳо  Пайғамбаримизнинг биринчи аёллари бўлиб, у Зот Хадижа онамизга уйланганларида йигирма беш ёшда, онамиз эса қирқ ёшда эдилар.

Кўриниб турибдики, бу никоҳда шаҳвонийлик мақсад эмас. Аллоҳ таоло Ўз ҳикмати ила Муҳаммад алайҳиссаломни пайғамбарликни қабул қилиб олишга тайёрлар эди. Дарҳақиқат, Хадижа онамиз Муҳаммад соллаллоҳу алайҳи васалламга Жаброил алайҳиссалом биринчи бор ваҳий келтириб, у Зот қўрқиб кетганларида таскин берарканлар, пайғамбарликка мушарраф бўлганларини тушуниб, иймон келтирганлар. Кейинчалик ҳам Хадижа онамиз Пайғамбаримизга энг оғир пайтларда ишончли ёрдамчи бўлдилар. Ўзларининг мол-мулкларини, жамиятдаги обрўларини ва бор имкониятларини Ислом йўлида сарфладилар. Ўша пайтда Хадижа онамизнинг ўринларида тажрибасиз ёш келин бўлганида бундоқ оқилона ишларни қила олмас эди».[1]

Расулуллоҳ соллаллоҳу алайҳи васаллам 50 ёшларигача – 25 йил Хадижа онамиз билан мазмунли ҳаёт кечирдилар ва устларига бошқа хотин олмадилар. Умуман олганда, Пайғамбаримиз 53 ёшларигача, яъни Мадина ҳижратигача бир аёл билан яшаганлар.

Хадижа онамиз билан Расулуллоҳ соллаллоҳу алайҳи васалламнинг ёшлари ўртасидаги фарқни баъзи кимсалар ҳазм қилолмасликлари мумкин. Аммо кечаю кундуз Пайғамбаримизнинг «камчиликлари»ни қидирган Қурайш мушриклари буни мутлақо айб санамаганини билсак, масала ойдинлашади!

Жаброил алайҳиссалом Пайғамбар алайҳиссаломнинг ҳузурларига келиб: «Эй Расулуллоҳ! Агар Хадижа ҳузурингизга келса, унга Парвардигори номидан ва менинг номимдан салом айтинг ҳамда унга хушхабар берингки, жаннатда унинг учун марвариддан кенг бир қаср бунёд этилган, у ерда шовқин-сурон ҳам, меҳнат-машаққат ҳам йўқ», дейди.[2]

Пайғамбаримизнинг насаблари Хадижа онамизнинг насаби билан тўққизинчи боболари Луайда бирлашади.[3]


[1] «Ҳадис ва Ҳаёт», 13-жуз, 35-бет.

[2] Бухорий ва Муслим ривояти.

[3] «Раҳматун лил оламин», 2-китоб.

 



Мавзуга оид мақолалар
Тарихда бугун
Робиъул-аввал ойининг 17-куни
  • Ҳижрий 950-йил 17-робиъул-аввал куни (милодий 1543-йил 20-июн) Усмонлилар ҳарбий денгиз флоти Барбароса қўмондонлигида Ситсилия ва Италиянинг баъзи қирғоқларини ва Типпер дарёсида жойлашган Остия портини қўлга киритади.
  • Ҳижрий 1110-йил 17-робиъул-аввал куни (милодий 1697-йил 25-май) Усмонлилар ҳарбий денгиз флоти Ўрта ер денгизидаги Медела оролининг жанубида бўлган жангда Винеция ҳарбий денгиз флотини мағлуб этди. Бу жангда 2500га яқин винециялик ҳарбийлар ҳалок бўлди.
 


Китоблар
ИСЛОМ.УЗ ПОРТАЛИНИНГ САЙТЛАРИ